CORPVS CHRISTI

IDEM SANCTVM VERBVM NOSTRI SIMILE FACTVM EST, ET VITAM INTER NOS AGENS, CVM ESSET QVOD ERAT ET CERNERETVR QVOD NON ERAT, INQVIT AD SACRVM APOSTOLORVM COETVM, PANEM DISTRIBVENS: "ACCIPITE, COMEDITE DE HOC OMNES, HOC EST CORPVS MEVM", NONDVM VVLNERATVM IN CRVCE PER LANCEA IN LATERE. ET VIDEMVS SANCTVM ILLVM PANEM HODIE IN ARA INCRVENTA TEMPORE DIVINI ET MYSTICI OFFICII, IN IMPOLLVTA PROPOSITVM MENSA, NON TAMEN SIMILEM IMAGINI SALUTIFERI CORPORIS DEI ET VERBI[...] EST HOC QVIDEM ERECTVM, ARTVBVS COMPOSITVM, INCEDENDI VIM HABENS ET AGENDI; ILLVD AVTEM ROTVNDVM, NON ARTICVLATVM, INANIMATVM, EXSANGVE, IMMOBILE, NEQVE ALTERI SIMILE, NON EI QVI CERNITVR ET INVISIBILIS EST DIVINITATE. CREDIMVS NIHILOMINVS SECVNDVM SERMONEM DIVINVM, ETIAMSI NON SIT SIMILE VEL AEQVALE, PROPRIE TAMEN CONVENIENTER ID ESSE CORPVS DIVINVM, QVOD IN DIVINA MENSA SANCTE CONSECRATVR, ET VNIVERSO COETVI SACRO ABSQVE SECTIONE DIVIDITVR ET ABSQVE DEFECTV PARTICIPATVR.

( S. CAESARII NAZIANZENI EX DIALOGIS III, 169)

O DVLCEM PERMVTATIONEM, O IMPERVESTIGABILEM INSTITVTIONEM, O INEXSPECTATA BENEFICIA, VT INIQVITAS QVIDEM MVLTORVM ABSCONDATVR IN VNO IVSTO, IVSTITIA AVTEM VNIVS MVLTOS INIVSTOS IVSTIFICET!

(AD DIOGNETVM IX, 5)

Κύριε ἐλέησον

VENI SANCTE SPIRITVS

SPIRITVS SANCTVS
IN ABSIDE BASILICAE SANCTI PETRI 

OPERE CONSVMATO, QVOD PATER FILIO COMMISIT IN TERRA FACIENDVM, MISSVS EST SPIRITVS SANCTVS DIE PENTECOSTES, VT ECCLESIAM IVGITER SANCTIFICARET, ATQVE ITA CREDENTES PER CHRISTVM IN VNO SPIRITV ACCESVM HABERENT AD PATREM. IPSE EST SPIRITVS VITAE SEV FONS AQVAE SALIENTIS IN VITAM AETERNAM, PER QVEM PATER HOMINES, PECCATO MORTVOS, VIVIFICAT, DONEC EORVM MORTALIA CORPORA IN CHRISTO RESVSCITET.

SPIRITVS IN ECCLESIA ET IN CORDIBVS FIDELIVM TAMQVAM IN TEMPLO HABITAT, IN EISQVE ORAT ET TESTIMONIVM ADOPTIONIS FILIORVM REDDIT. ECCLESIAM, QVAM IN OMNEM VERITATEM INDVCIT ET IN COMMVNIONE ET MINISTRATIONE VNIFICAT, DIVERSIS DONIS HIERARCHICIS ET CHARISMATICIS INSTRVIT AC DIRIGIT, ET FRVCTIBVS SVIS ADORNAT.

VIRTVTE EVANGELII IVVENESCERE FACIT ECCLESIAM EAMQVE PERPETVO RENOVAT ET AD CONSVMMATAM CVM SPONSO SVO VNIONEM PERDVCIT. NAM SPIRITVS ET SPONSA AD DOMINVM IESVM DICVNT: VENI!

(SACROSANCTI CONCILII VATICANI SECVNDI EX CONSTITVTIONE DOGMATICA "LVMEN GENTIVM" DE ECCLESIA N. 4)

ASCENDIT DEVS IN IVBILO, ET DOMINVS IN VOCE TVBAE!

"ASCENSIO DOMINI"
GIOTTO

HODIE DOMINVS NOSTER IESVS CHRISTVS ASCENDIT IN CAELVM; ASCENDAT CVM ILLO COR NOSTRVM.

AVDIAMVS APOSTOLVM DICENTEM: SI CONSVRREXISTIS CVM CHRISTO, QVAE SVRSVM SVNT SAPITE, VBI CHRISTVS EST IN DEXTERA DEI SEDENS; QVAE SVRSVM SVNT QVAERITE, NON QVAE SVPER TERRAM. SICVT ENIM ILLE ASCENDIT, NEC RECESSIT A NOBIS, SIC ET NOS CVM ILLO IBI IAM SVMVS, QVAMVIS NONDVM IN CORPORE NOSTRO FACTVM SIT QVOD PROMITTITVR NOBIS.

ILLE IAM EXALTATVS EST SVPER CAELOS; PATITVR TAMEN IN TERRIS QVIDQVID LABORVM NOS TAMQVAM EIVS MEMBRA SENTIMVS. CVI REI TESTIMONIVM PERHIBVIT DESVPER CLAMANS: "SAVLE, SAVLE, QVID ME PERSEQVERIS?" ET: "ESVRIVI, ET DEDISTIS MIHI MANDVCARE."

CVR NON ETIAM NOS ITA LABORAMVS IN TERRIS, VT PER FIDEM, SPEM, CARITATEM, QVA ILLI CONECTIMVR, IAM CVM ILLO REQVIESCAMVS IN CAELIS? ILLE, CVM IBI EST, ETIAM NOBISCVM EST; ET NOS, CVM HIC SVMVS, ETIAM CVM ILLO SVMVS. ILLVD IPSE ET DIVINITATE ET POTESTATE ET DILECTIONE; HOC AVTEM NOS, ETSI DIVINITATE NON POSSVMVS SICVT IPSE, DILECTIONE TAMEN POSSVMVS, SED IN IPSVM.

ILLE DE CAELO NON RECESSIT, CVM AD NOS INDE DESCENDIT; NEC A NOBIS RECESSIT, CVM IN CAELVM RVRSVS ASCENDIT. NAM QVIA IBI ERAT, CVM HIC ESSET, ITA IPSE TESTATVR: NEMO, INQVIT, ASCENDIT IN CAELVM, NISI QVI DE CAELO DESCENDIT, FILIVS HOMINIS, QVI EST IN CAELO.

HOC DICTVM EST PROPTER VNITATEM, QVIA CAPVT NOSTRVM EST, ET NOS CORPVS EIVS. HOC ERGO NEMO NISI IPSE, QVIA ET NOS IPSE SECVNDVM ID QVOD IPSE FILIVS HOMINIS PROPTER NOS, ET NOS DEI FILII PROPTER IPSVM.

ITA QVIPPE APOSTOLVS DICIT: SICVT ENIM CORPVS VNVM EST, ET MEMBRA HABET MVLTA; OMNIA AVTEM CORPORIS MEMBRA. CVM SINT MVLTA, VNVM EST CORPVS, ITA ET CHRISTVS. NON AIT: ITA CHRISTVS, SED AIT: ITA ET CHRISTVS. CHRISTVS ERGO MEMBRA MVLTA, VNVM CORPVS.

DESCENDIT ITAQVE DE CAELO PER MISERICORDIAM, NEC ASCENDIT NISI IPSE, CVM ET NOS IN IPSO PER GRATIAM. AC PER HOC NON NISI CHRISTVS DESCENDIT, NEC NISI CHRISTVS ASCENDIT; NON QVOD CAPITIS DIGNITAS CONFVNDATVR IN CORPORE, SED QVOD CORPORIS VNITAS NON SEPARETVR A CAPITE.

(SANCTI AVGVSTINI EPISCOPI EX SERMONE DE ASCENSIONE DOMINI, PLS 2, 494-495)

LITHOSTROTVM SVPRA IANVAM SANCTAE SABINAE BASILICAE MAIOREM

QVISQVIS ROMAM VENIAT INTER INSCRIPTIONES VARIAS QVI SVPERSVNT IN BASILICA SANCTAE SABINAE IN AVENTINO MONTE  HOC PVLCHERRIMVM CHRISTIANAE INSCRIPTIONIS ANTIQVAE EXEMPLVM HEXAMETRIS COMPOSITVM SAECVLO V P. CHR. N. MIRARI POTEST:

CVLMEN APOSTOLICVM CVM CAELESTINVS HABERET

PRIMVS ET IN TOTO FVLGERET EPISCOPVS ORBE

HAEC QVAE, MIRARIS FVNDAVIT PRESBYITER VRBIS

ILLYRICA DE GENTE PETRVS VIR NOMINE TANTO

DIGNVS AB EXORTV CHRISTI NVTRITVS IN AVLA

PAVPERIBVS LOCVPLES SIBI PAVPER QVI BONA VITAE

PRAESENTIS FVGIENS MERVIT SPERARE FVTVRAM

LATERIBVS ISCRIPTIONIS LAEVO ET DEXTRO SVNT DVARVM MULIERVM IMAGINES QVAE SIGNIFICANT ORIGINEM CATHOLICAE ECCLESIAE DVPLICEM: EX CIRCUMCISIONE (LATERE LAEVO) GENTIBVSQVE (LATERE DEXTRO) VT  INFRA VIDERE POSSIMVS:

HAEC SVNT FIDEI NOSTRAE RADICES QVARVM OBLIVISCI NON POSSIMVS!

AVRELIVS